‘n Lekker luukse, leergebonde medisynepilletjie

Ek was gister by ‘n gesprek oor hoe mens die Bybel moet lees. Snaaks genoeg, na gister se uitlatings, het ek maar redelik my mond gehou. Daar was in elk geval ander mense wat dit beter kan beduie. Wat my wel opgeval het – en sulke goed val my deesdae al hoe meer op – is hoeveel mense luukse leergebonde Bybels het. (Ek het self een – goed, ek het toevallig meer as een.) Kan ons dit regtig regverdig om so duur vir Bybels te betaal? Dis tog nie regtig funksioneel nie – net luuks? 

Ek onthou toe ek nog ‘n kinders was, het my ouers altyd ons kolliehonde se medisyne in allerhande ander kos probeer verdoesel. Sommige van die goed het maar aardig geruik vir my; ander kere was dit prima stukkies vleis. Die honde het natuurlik die ou happies verslind. (Ons honde was nie van daardie tipes wat oormatig gepamperlang is nie – die kleinste ou stukkie vleis het hulle seker pure wolf laat voel.) Soms het hulle al rondom die pilletjies geëet, sodat mens maar weer probeer het met ‘n ander stuk. Een of ander tyd het die medisyne darem ingegaan.

Miskien is ‘n luukse Bybel maar net die happie waarin die medisyne gerol is. Dit wat mens in die Bybel lees, is immers nie altyd so lekker nie. O ja, daar is dele wat mens opgewonde maak. Dis nou natuurlik, as mens die ding lees. Ek dink nog steeds dis te veel geld wat vermors word. Dit beteken natuurlik nie dat ek nou myne gaan brand en die goedkoopste een gaan aanskaf nie – dis mos onsinnig om een fout met ‘n ander te probeer regmaak. Ek gaan egter nie sommer weer vir myself so ‘n luukse uitgawe koop nie, en definitief ander mense aanraai om twee keer te dink voor hulle doen!

7 Responses to ‘n Lekker luukse, leergebonde medisynepilletjie

  1. Sonkind sê:

    Ek kan nie insien hoekom daar fout moet wees met ‘n leergebonde Bybel nie. As mens ‘n boekliefhebber is en verkies om hardebandboeke te koop, omdat hulle netjieser lyk en langer hou, hoekom suinig wees wanneer jy ‘n Bybel gaan koop?

    Vir my is dit so half of jy afskeep dan as dit by jou Bybel kom. Daar is oorgenoeg goedkoop Bybels ook, vir mense wat ‘n Bybel wil hê, maar nie baie geld het nie. Die inhoud gaan nie verander oor die buitekant nie, maar ek het genoeg respek vir my Bybel om die beste een te koop wat ek kan bekostig.

  2. Ronald sê:

    Ek gee toe, dalk het ek in my relaas oor die luukse Bybels ‘n bietjie te ver gegaan. Die Bybelgenootskap is immers ‘n nie-winsgewende organisasie wat die geld wat hulle kry vir luukse Bybels terugploeg in goedkoop Bybels. Dit kos hulle baie meer as R40 om daardie R40ers (die swartband Bybels) te maak.

    Die armoede-kwessie – die groot gaping tussen ryk en arm in ons land – begin my net al hoe meer pla, dis al. Sonkind, jy is heeltemal reg. As mens nou gaan staan en net ‘n goedkoop Bybel koop terwyl jy ook nie anders lewe nie, dan is dit ook maar ‘n vorm van skynheiligheid. Iewers moet mens egter ‘n verantwoordelike balans handhaaf – om nie spandabelrig te leef nie, maar ook darem nie lewenskwaliteit in te boet nie. (Of dalk so bietjie lewenskwaliteit in te boet – dis dalk juis wat die evangelie vra?) Ek vra om verskoning as ek op tone getrap het; ek dink ons stem darem saam dat dit die boodskap van die Bybel is wat belangrik is.

    Gits, ek gaan sommer nou ‘n ander draai loop. Tussen al die vroeë manuskripte wat ons van die Nuwe Testament het, is daar ook heelwat verskille in die “luuksheid” van die uitgawes. Party van hulle is so met die hand geskryf dat mens kon sien dit was sommer baie vinnig gedoen en vir privaatgebruik; ander was nou weer groot en met ‘n professionele hand geskryf – waarskynlik om as ‘n tipe van ‘n Kanselbybel te dien. Die mees luukse uitgawes het natuurlik eers baie later hul opwagting gemaak, toe die kerk al goed gevestig is. Dit het goue skrif om nuwe paragrawe aan te dui; party van hierdie manuskripte is in silwer geskryf op velle van die beste gehalte wat pers gekleur was. (Pers was ‘n baie duur kleur om te kleur – daarom ook die koninklike kleur). Miskien was dit toe verkeerd – die kerk het die arm mense lelik uitgebuit – maar dis darem nie dieselfde situasie as vandag nie.

    Skuus, ek kon myself nie help nie. Het so bietjie ingehou met die beskrywing van die manuskripte. :o)

  3. Sonkind sê:

    Ronald, ek stem heeltemal saam met jou oor die armoede kwessie en die groot gaping tussen ryk en arm in ons land. Ek het ‘n broertjie dood aan eienaars van maatskappye, waarvan die mense die eienaar ryk gewerk het, terwyl hulle met ‘n broodlyn loon tevrede moes wees.

    Eintlik dink ek dat ek so bietjie kommunisties is, maar ek weet dat dit ook nie heeltemal werk as manier van regeer nie. Dalk sosialisties? Dis nogal vir my ‘n persoonlike vraagstuk – is daar nie iewers ‘n goue middeweg waar ons almal kan werk hê en ‘n leefbare salaris verdien nie?

    Maar dis seker lala-land waarvan ek droom en sal nie in my leeftyd gebeur nie. Elk geval, ek geniet jou skrywe, al verskil ek in die leergebonde Bybel-geval bietjie met jou ;-)

  4. Ronald sê:

    Wel, dan droom ons saam van lala-land ;o)

  5. Cobus sê:

    Ronald, ek sal vir jou ‘n ander vraag wil vra: Wat van kopiereg op Nestlé Aland tekste en bybelvertalings? Moet die dan nou nie gratis beskikbaar wees vir elkeen nie?

    PS! Ek verkies maar my R40 Bybeltjie met sy jean-cover wat van een van Maryke se ou broeke gemaak is. Of die klein blou NIV’tjie… ek wonder soms oor daai R200 Boodskappe…

  6. Ronald sê:

    Ja, die Nestle-Aland Bybeltjie. Party mense dink mos brandewyn bly altyd ‘n bargain, maak nie saak hoeveel dit kos nie. Ek voel so bietjie so oor die NA. Teen R200 is dit steeds ‘n bargain. :)

    Op ‘n meer ernstige noot: ek dink nie dis te veel gevra om te betaal vir ‘n NA teks nie. Ek dink ook nie hulle maak eintlik verskriklik baie wins daarop nie – die Bybelgenootskap, bedoel ek nou. (Boekwinkels merk dit natuurlik baie op!) Die verg natuurlik nogal redelik tegniese kennis om die teks bymekaar te sit – en die tipe druk van die boek jaag ook die koste op, dink ek. Dit sal natuurlik wonderlik wees as mens dit verniet kon kry: maar die mense wat daaraan gewerk het moet ook seker darem betaling kry.

    So terloops, ons trek nou by NA27. NA28 gaan beide op die internet beskikbaar wees sowel as in boekvorm. Mens gaan dan op die tekskritiese apparaat kan kliek, dan vat dit jou na ‘n transkripsie van ‘n manuskrip toe. Ek weet die ouens werk daarna om digitale foto’s van manuskripte ook so op die internet beskikbaar te maak. (Die groot probleem is natuurlik die kopiereg op die indiwiduele manuskripte – wat in verskeie museums gehuisves word.) Ek vermoed mens gaan moet geld betaal hiervoor, maar dit behoort weereens nie te veel te wees nie (behalwe as jy dink die feit dat mens betaal is klaar te veel). Mens kan hier meer uitvind: http://www.uni-muenster.de/INTF/ (kliek op Digital Nestle-Aland).

    Nog iets: die werk wat die Instituut vir Nuwe Testamentiese Teksnavorsing doen, word grootliks deur skenkings moontlik gemaak. Ek het ‘n vermoede dat daar ‘n prys op die Bybeltjie geplaas word suiwer oor die drukkostes (en vervoerkostes na SA).

  7. cobus sê:

    Ai, as ou Paulus wat homself onderhou het darem geweet het wat mense sal betaal vir ‘n stukkie van een van sy briewe… of net ‘n fototjie daarvan… :-)

Lewer kommentaar

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out / Change )

Twitter picture

Jy lewer kommentaar met jou rekening by Twitter. Log Out / Change )

Facebook photo

Jy lewer kommentaar met jou rekening by Facebook. Log Out / Change )

Google+ photo

Jy lewer kommentaar met jou rekening by Google+. Log Out / Change )

Connecting to %s

%d bloggers like this: